Дорогие, братья и сестры! Присоединяйтесь к соборной молитве! Читаем вместе канон и молитву во время брани против супостатов! Можно распечатать и читать каждый день или даже несколько раз в день! Благослови, Господи, богохранимую страну нашу Российскую и воинство наше!

Версия pdf

КАНО́Н И МОЛИ́ТВА
ИЗ МОЛЕ́БНАГО ПЕ́НИЯ ВО ВРЕ́МЯ БРА́НИ
ПРОТИ́В СУПОСТА́ТОВ, НАХОДЯ́ЩИХ НА НЫ

Песнь 1
Ирмо́с: Колесницегони́теля фарао́ня погрузи́, чудотворя́й иногда́ моисе́йский жезл, крестообра́зно порази́в и раздели́в мо́ре: Изра́иля же беглеца́, пешехо́дца спасе́, пе́снь Бо́гови воспева́юща.
Припе́в: Многоми́лостиве Го́споди, сокруши́ враги́ под но́ги на́ша.
Грех ра́ди на́ших и беззако́ний попусти́л еси́, Правосу́де, враго́м на́шым озло́бити нас: но милосе́рдия ра́ди твоего́, Человеколю́бче, отврати́ от нас пра́ведный гнев Твой, и поми́луй нас.
Я́коже дре́вле на Амали́ка побе́ду уго́днику Твоему́ Моисе́ю дарова́л еси́, Ми́лостиве Бо́же: та́ко и ны́не, мо́лим Тя побе́ду на враги́ ве́рным лю́дем Твои́м да́руй.
Сла́ва: Крестообра́зно просте́ртыма рука́ма Моисе́овыма амали́кову си́лу низложи́л еси́, Всеси́льне: и ны́не мо́лим Тя, пода́ждь нам си́лу на сокруше́ние и попра́ние возстаю́щих на ны.
И ны́не: Си́лою неизрече́нною Твое́ю, Многоми́лостиве Христе́, защити́ лю́ди Твоя́ от вся́кия напа́сти, побе́ду да́руя на враги́, ра́ди Пречи́стыя Твоея́ Ма́тере, и всех святы́х.
Песнь 3
Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты мене́ утверди́ в любви́ Твое́й, жела́ний Кра́ю, ве́рных Утвержде́ние, еди́не Человеколю́бче.
Неизрече́нным милосе́рдием Твои́м защити́, Христе́, лю́ди Твоя́, и низложи́ де́рзость враго́в на́ших.
Я́коже дре́вле пре́дал еси́, Бо́же, иноплеме́нников ве́рному рабу́ Твоему́ Иису́су Нави́ну: та́ко и ны́не, Многоми́лостиве, преда́ждь сопроти́вныя по́лчища в ру́ки ве́рным рабо́м Твои́м.
Сла́ва: Не преда́ждь нас, Влады́ко, грех ра́ди на́ших и беззако́ний в ру́ки враго́в, но преложи́ пра́ведный гнев Твой на ми́лость, и пода́ждь утеше́ние рабо́м Твои́м.
И ны́не: Ма́ти Бо́жия, сохрани́ под кро́вом Твои́м христолюби́вое во́инство и страну́ на́шу, и Свои́м предста́тельством у Сы́на Своего́, Христа́ Бо́га на́шего, испроси́ нам побе́ду на враги́ и супоста́ты на́ша.
Катава́сиа: Изба́ви от бед рабы́ Твоя́, Ми́лостиве: я́ко мы усе́рдно к Тебе́ прибега́ем, к Ми́лостивому Изба́вителю, всех Влады́це, Го́споду Иису́су.

Седа́лен:
Це́рковь вопие́т Ти, Христе́ Бо́же: си́лою Креста́ Твоего́ укрепи́ ве́рныя рабы́ Твоя́, и пода́ждь им побе́ды на сопроти́вныя.
Богоро́дичен:
Богоро́дице Де́во, ско́рая ми́ру Помо́щнице, Твоего́ предста́тельства и заступле́ния про́сим: умоли́ Ми́лостиваго Сы́на Твоего́ и Бо́га, от належа́щих бед изба́вити ны.

Песнь 4
Ирмо́с: Ты моя́ кре́пость, Го́споди, ты моя́ и си́ла, ты мой Бог, ты мое́ ра́дование, не оста́вль не́дра О́тча, и на́шу нищету́ посети́в. тем с проро́ком Авваку́мом зову́ ти: си́ле твое́й сла́ва, Человеколю́бче.
Влады́ко Бо́же, милосе́рдием щадя́й лю́ди Твоя́, напа́стьми же и скорбьми́ обраща́яй их па́ки к Себе́, отврати́ гнев Твой, и преложи́ ско́рбь на́шу на ра́дость, побе́ду на сопроти́вныя да́руя.
Не вни́ди в суд с рабы́ Твои́ми, Правосу́де, зане́ никто́же постои́т пред Тобо́ю: но призира́я ми́лостивно на смире́ние на́ше, поми́луй нас, и пода́ждь нам утеше́ние.
Сла́ва: Влады́ко Го́споди, руко́ю Твое́ю всеси́льною во глубине́ погрузи́вый фарао́на, Ты и ны́не де́рзость супоста́тов на́ших си́лою Креста́ Твоего́ низложи́, презира́я согреше́ния на́ша, я́ко еди́н Благоутро́бен.
И ны́не: Вели́кое дерзнове́ние и́маши к Ро́ждшемуся из Тебе́, я́ко никто́же ин: те́мже, Влады́чице, моли́ся о рабе́х Твои́х, изба́витися нам от наше́ствия иноплеме́нников.
Песнь 5
Ирмо́с: Вску́ю мя отри́нул еси́ от лица́ Твоего́, Све́те незаходи́мый, и покры́ла мя е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.
Не помина́й, Влады́ко, безчи́сленныя собла́зны на́ша: но вско́ре преложи́в гнев Твой на милосе́рдие, низложи́ враги́ на́ша, и лю́ди Твоя́ сохрани́ ми́лостию Твое́ю.
При́зри, Ми́лостиве, на лю́ди Твоя́, су́щия в ско́рбех, и пода́ждь нам свы́ше по́мощь Твою́ на одоле́ние враго́в на́ших.
Сла́ва: Укрепи́вый дре́вле на го́рдаго Голиа́фа мы́шцу кро́ткаго Дави́да, и ны́не, Влады́ко, укрепи́ ве́рныя лю́ди Твоя́, побе́ду дая́ им на супоста́ты.
И ны́не: Тя еди́ну Пречи́стую Засту́пницу и́мамы непобеди́мую, и на Тя упова́юще вопие́м Ти: изба́ви нас, Влады́чице, от всех бед и зол.
Песнь 6
Ирмо́с: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.
Избавле́й, Влады́ко, в ско́рби су́щия лю́ди евре́йския, и Сампсо́ну пода́вый кре́пость Твое́ю си́лою: Ты и ны́не, Ми́лостиве, изба́ви лю́ди Твоя́ от сопроти́вных, и побори́ борю́щия ны.
Ди́вен еси́, Бо́же, Твое́ю всеси́льною десни́цею спаса́яй упова́ющия на Тя: вся бо рука́ Твоя́ мо́жет. те́мже и ны́не мо́лим Тя, изба́ви нас от враг на́ших.
Сла́ва: О́ком Твои́м всеви́дящим, ви́дя насле́дие Твое́, Бо́же, от сопроти́вных озлобля́емо, умилосе́рдися, Влады́ко, на лю́ди Твоя́, и низложи́ вра́жию де́рзость.
И ны́не: Под твое́ благоутро́бие прибега́ем, Богоро́дице Де́во, моле́ния на́ша не пре́зри во обстоя́нии: но от бед изба́ви ны, еди́на Чи́стая и Благослове́нная.
Катава́сия: Изба́ви от бед рабы́ Твоя́, Ми́лостиве: я́ко мы усе́рдно к Тебе́ прибега́ем, к Ми́лостивому Изба́вителю, всех Влады́це, Го́споду Иису́су.

Конда́к, глас 4:
Вознесы́йся на Крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же: возвесели́ нас си́лою Твое́ю, побе́ды дая́ нам на супоста́ты, посо́бие иму́щым Твое́ ору́жие ми́ра, непобеди́мую побе́ду.
Песнь 7
Ирмо́с: Бо́жия снисхожде́ния огнь устыде́ся в вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.
Преста́ни от гне́ва, и при́зри ми́лостивно на ско́рбь на́шу, и не преда́ждь нас враго́м на́шим, отце́в Бо́же.
Согреши́хом, Го́споди, пред Тобо́ю: но ве́мы, я́ко несть грех, побежда́ющь милосе́рдие Твое́, и сего́ ра́ди во умиле́нии взыва́ем к Тебе́: поми́луй нас, отце́в Бо́же.
Сла́ва: Ве́мы, Го́споди, я́ко наказу́еши нас, я́ко Оте́ц сы́ны, да скорбьми́ обрати́ши ны к Тебе́, те́мже в покая́нии зове́м Ти: оста́ви нам до́лги на́ша, и изба́ви нас от враг на́ших, отце́в Бо́же.
И ны́не: Подви́гни, Влады́чице, А́нгелы и Арха́нгелы, ли́ки же проро́ков, апо́стол и му́ченик, согла́сно умоли́ти Сы́на Твоего́ и Бо́га, да изба́вит ны от всех вра́жеских наве́тов и нахожде́ний.
Песнь 8
Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Кто изочте́т, Христе́, неизрече́нныя Твоя́ ми́лости? Презира́еши бо грехи́ ка́ющихся, боле́зни же исцеля́еши, и бра́ни вся отвраща́еши, и безу́мныя укроща́еши стра́сти, те́мже мо́лимся Тебе́: Человеколю́бче Го́споди, обрати́ гнев Твой на милосе́рдие к нам.
Разжени́ враги́ на́ша руко́ю Твое́ю, Го́споди, и защити́ нас лю́ди Твоя́, побе́ду, я́коже дре́вле Дави́ду и Иису́су Нави́ну на иноплеме́нники, подая́ ны́не нам на вся возстаю́щия на ны супоста́ты.
Сла́ва: Проро́цы со апо́столы, му́ченицы со святи́тели, и преподо́бнии отцы́ со все́ми святы́ми, моли́тву твори́те ко Христу́ за ны приле́жно, да прело́жит гнев на ми́лость, побе́ду подая́ нам на сопроти́вныя враги́.
И ны́не: Богоро́дице Всепе́тая, Ты вся мо́жеши у Преве́чнаго Сы́на Твоего́: моли́ у́бо Его́, я́ко Милосе́рдая Ма́ти, изба́вити ны от всех зол, да Тя непреста́нно велича́ем.
Песнь 9
Ирмо́с: Ужасе́ся о сем Не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее Небе́с: тем Тя, Богоро́дицу, А́нгелов и челове́к чинонача́лия велича́ют.
Удиви́шася, Христе́, щедро́ты Твоя́, я́же на согре́шшия Тебе́ показа́л еси́ испе́рва оби́льно, на ня́же упова́юще, и мы гре́шнии припа́даем Ти и мо́лимся: и нам ны́не яви́ благоутро́бие и щедро́ты Твоя́, да Тя непреста́нно велича́ем.
При́зри ми́лостивно, Го́споди, на смире́нныя рабы́ Твоя́, ко Твоему́ благоутро́бию припа́дающия, и на Тя еди́наго все упова́ние возлага́ющия, и пода́ждь ве́рным лю́дем Твои́м си́лу и кре́пость на одоле́ние всех враго́в на́ших, да Тя, всеси́льнаго Помо́щника, непреста́нно велича́ем.
Сла́ва: Я́ко о́чи рабо́в в руку́ госпо́дий свои́х, та́ко всегда́ о́чи на́ши к Тебе́, Многоми́лостиве Го́споди Бо́же наш, при́зри у́бо ми́лостивно на ны, и низложи́ си́лою Твое́ю горды́ню враго́в на́ших, и под но́зе во́инства на́шего тех покори́, да Тя непреста́нно велича́ем.
И ны́не: Ма́ти Бо́жия, принеси́ усе́рдныя моли́твы на́ша Сы́ну Твоему́, и Бо́гу на́шему, да спасе́т ны Тобо́ю от всех враго́в на́ших.
Катава́сия: Изба́ви от бед рабы́ Твоя́, Ми́лостиве: я́ко мы усе́рдно к Тебе́ прибега́ем, к Ми́лостивому Изба́вителю, всех Влады́це, Го́споду Иису́су.

Моли́тва:
Го́споди Бо́же наш, послу́шавый Моисе́я, просте́ршаго к Тебе́ ру́це, и лю́ди Изра́илевы укрепи́вый на Амали́ка, ополчи́вый Иису́са Нави́на на брань и повеле́вый со́лнцу ста́ти. Ты и ны́не, Влады́ко Го́споди, услы́ши нас, моля́щихся Тебе́. Укрепи́ си́лою Твое́ю ве́рныя лю́ди Твоя́, утверди́ всеси́льною Твое́ю десни́цею страну́ на́шу, сохрани́ во́инство ея́, посли́ А́нгела Твоего́, укрепля́ющаго их, отыми́ всяк глад и па́губу, сохрани́ их от взры́вов, огня́, пуль и оско́лков, пода́ждь им вся я́же ко спасе́нию проше́ния, спутеше́ствуя им во всем. Посли́, Го́споди, неви́димо десни́цу Твою́, рабы́ Твоя́ заступа́ющую во всех. Я́ко Твоя́ держа́ва, Ца́рство и си́ла, от Тебе́ вси по́мощь прие́млем, на Тя упова́ем, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.

Версия pdf